Fyrsta messa Kvennakirkjunna þetta árið verður í Laugarneskirkju, sunnudaginn 19. janúar kl. 20. Sr. Auður Eir Vilhjálmsdóttir prédikar. Kór Kvennakirkjunnar leiðir söng undir stjórn Aðalheiðar Þorsteinsdóttur og Anna Sigríður Helgadóttir syngur. Að venju verður boðið til messukaffis og þær sem sjá sér fært að koma með meðlæti á kaffiborðið fá alúðar þakkir. Tökum frá tíma í dagsins önn og mætum í samfélag Guðs.
Skipuleggur þú stefnumót við Guð? Hefur þú áhuga á að dýpka samband þitt við Guð? Fjögurra kvölda námskeið Kvennakirkjunnar þar sem kristnar íhugunar- og hugleiðslu aðferðir verða kynntar og iðkaðar. Námskeiðið stendur yfir 4 mánudagskvöld, frá 20. Janúar til og með 10. febrúar í stofum Kvennakirkjunnar, Þingholtsstræti 17. Námskeiðið kostar 4000,- kr. Arndís G. Bernhardsdóttir Linn prestur Kvennakirkjunnar kennir fyrstu 3 kvöldin og Þóra Björnsdóttir hjúkrunarfræðingur kennir síðasta kvöldið.
Með aldagömlum aðferðum kristinnar trúar lærum við að opna hjarta okkar og taka á móti Guði, í þögn og kyrrð og dýpka þannig tengslin við Guð og þroska trú okkar.
20. janúar kl. 19:30. Með Guði í kyrrð: Kynning á aðferð Kyrrðarbænarinnar (Centering Prayer) fyrri hluti
27. janúar kl. 19.30 Með Guði í kyrrð; Kynning á aðferð Kyrrðarbænarinnar (Centering Prayer) seinni hluti
3. febrúar kl. 19:30 Með Guði í Biblíunni: Biblíuleg íhugun (lectio divina)
10. febrúar kl.19:30 Upppörvun og slökun með Þóru Björnsdóttur hjúkrunarfræðing
Um leið og Kvennakirkjukonur óska öllum nær og fjær velfarnaðar á nýju ári er blásið til hugmyndafundar næstkomandi fimmtudag, 9. janúar. Hugmyndafundurinn verður í sölum Kvennakirkjunnar að Þingholtsstræti 17 og hefst kl. 17:30. Á fundinum verða settar fram og unnið úr hugmyndum um starfið framundan, námskeið og guðsþjónustur.
Jólamessa Kvennakirkjunnar verður haldin í Háteigskirkju 27. desember kl. 20:00. Séra Arndís G. Bernhardsdóttir Linn prédikar, Hallfríður Ólafsdóttir leikur á þverflautu og Anna Sigríður Helgadóttir syngur einsöng. Aðalheiður Þorsteinsdóttir leiðir jólasöng með kór Kvennakirkjunnar og á eftir verður jólakaffi.
Þá hefur annað upplag að nýútkomnu hefti í ritröð Kvennakirkjunnar, Vertu leiðtogi í þínu eigin lífi eftir Auði Eir Vilhjálmsdóttir verið gefið út.
Þetta er lítið hefti í 5 köflum og 5 fallegum litum og er um möguleikana til að lifa hversdagslegu lífi okkar með hin undursamlegu ráð Fjallræðunnar í hjarta okkar. Heftið var upprunalega kynnt á nýafstöðu námskeiði í Kvennakirkjunni með sama nafni.
Heftið fæst á 1500 krónur.
Hægt er að hafa samband við þær sem bralla daglega í Þingholtsstræti – og svo verður heftið líka til sölu í Kirkjuhúsið. Síminn okkar er 551 3934 og netfangið kvennakirkjan (hja) kvennakirkjan.is. Nú svo er líka hægt að hringja til Auðar í 864 2534.
Bókin vakti svoddan lukku á námskeiðinu að konum fannst nauðsynlegt að gefa tækifæri til að hafa hana til gjafa svo Aðalheiður prentsmiðjustóri okkar prentaði meira fyrir okkur.
Aðventumessa verður 1. desember klukkan 20 í Kirkju Óháða safnaðarins við Háteigsveg á fyrsta sunnudegi í aðventu
Séra Auður Eir Vilhjálmsdóttir predikar. Kór Kvennakirkjunnar leiðir aðventusöng undir stjórn Aðalheiðar Þorsteinsdóttur
Kaffi á eftir . Þær sem sjá sér fært að færa okkur góðgerðir með kaffinu fá alúðarþakkir
Við komum til að finna frið og hugrekki og förum heim með þessar undursamlegur gjafir Guðs
Þriðjudaginn 12. nóvember heldur dr. Mary Hunt opinberan fyrirlestur í boði Guðfræðistofnunar í stofu 220 í Aðalbyggingu HÍ. Fyrirlesturinn hefst kl. 11:40 og er öllum opinn. Yfirskrift fyrirlestursins er:
Bandarískur femínisti talar um rómversk kaþólsku kirkjuna á eftirlendutímum
Rómversk kaþólska kirkjan gengur í gegnum miklar en jafnframt hægfara breytingar um þessar mundir, bæði hvað varðar kenningar og skipulag. Óljóst er hver staða kvenna kemur til með að verða og hið sama má segja um stöðu allra leikmanna innan kirkjunnar. Fram að þessu hefur rómversk kaþólska kirkjan verið sannkölluð prestakirkja en nú gerir óvígt fólk kröfu um að fá að taka þátt í ákvarðanatöku, útdeilingu sakramentanna og þjónustu kirkjunnar. Ómögulegt er að segja fyrir um það hvað þessar breytingar kunna að hafa í för með sér en í fyrirlestrinum leggur dr. Hunt áherslu á að útskýra ástandið eins og það er í dag.
Dr. Mary Hunt er kaþólskur guðfræðingur og femínisti sem setti á laggir guðfræði- og kvennastofnunina WATER (Women´s Alliance for Theology, Ethics and Ritual) í Washington D.C. árið 1983 og hefur veitt henni forstöðu í þrjátíu ár. Dr. Hunt er virk í kaþólsku kvennakirkjuhreyfingunni í Bandaríkjunum og hefur einnig starfað með mannréttindahreyfingu kaþólskra kvenna í Argentínu.
Dr. Hunt hefur skrifað og ritstýrt fjölda bóka og er ötull greinahöfundur. Meðal bóka hennar er Fierce Tenderness: A Feminist Theology of Friendship og Good Sex: Feminist Perspectives from the World’s Religions sem hún ritstýrði ásamt Patricia Beattie Jung og Radhika Balakrishnan.
Sjá nánar hér
Námskeið Kvennakirkunnar um kvennabaráttukonur sem höfðu kristna trú til styrktar í baráttu sinni svo sem er skrifað um í bókinni Kvennabarátta og kristin trú sem kom út 2007.
Námskeiðið er í Þingholtsstræti 17, í fimm mánudagskvöld frá 4. nóvember til 2. desember, frá klukkan hálf átta til níu.
Mánudagskvöldið 11. nóvember:
Arnfríður Guðmundsdóttir talar um Lúter og konurnar. Áhrif siðbótar Marteins Lúters á líf kvenna
Mánudagskvöldið 18. nóvember:
Dagný Kristjánsdóttir talar um skáldsögur Kristínar Sigfúsdóttur, „Gestur var ég …“
Mánudagskvöldið 25. nóvember:
Nína Leósdóttir talar um „þá heilögu hjónabandsstétt“ í fimm íslenskum húspostillum frá 1718 til 1901
Mánudagskvöldið 2. desember:
Sigríður Dúna Kristmundsdóttir talar um frumkvöðulinn Ólafíu Jóhannsdóttur, konu kvennanna.
Þetta verður dásamlegt. Verum innilega velkomnar. Við þurfum ekki að skrá okkur. Komum bara og njótum frábærra kvölda.
Kvennakirkjan býður til guðþjónustu í Grensáskirkju sunnudaginn 10. nóvember kl. 20. Séra Arndís G. Bernhardsdóttir Linn prédikar.
Aðalheiður Þorsteinsdóttir leiðir tónlist ásamt kórfélögum Kvennakirkjunnar. Anna Sigríður Helgadóttir syngur einsöng.
Boðið verður til messukaffis að guðþjónustunni lokinni. Þær sem sjá sér fært að koma með meðlæti á kaffiborðið fá alúðarþakkir.
Föstudaginn 8. nóvember n.k. flytur dr. Merete Thomassen opinberan fyrirlestur í boði Guðfræðistofnunar í stofu A69 í Aðalbyggingu HÍ. Fyrirlesturinn hefst kl. 11:40 og fer fram á norsku. Yfirskrift fyrirlestursins er: Tilhneigingar í nýju bænamáli:
Frá frelsi til vellíðunar. Breytingar á guðsmynd og mannskilningi undir áhrifum frá nýaldarhyggju og markaðskapítalisma
Í fyrirlestrinum fjallar dr. Thomassen um bænir sem notaðar hafa verið í nýjum guðsþjónustuformum innan norsku kirkjunnar. Hún skoðar bænirnar út frá nútímafræðilegu og textafræðilegu sjónarhorni.
Dr. Merete Thomassen er kennari í liturgíu við stofnun í kennimannlegri guðfræði við Háskólann í Ósló. Hún er höfundur bókarinnar Når dere ber. Om liturgisk språk og utforming av bønner til gudstjenesten sem kom út fyrr í haust. Sjá hér
