Fréttir

Bókarkynning verður í Kvennakirkjunni á mánudaginn 4.  desember í Þingholtsstrætinu.

Móðir, missir, máttur er nýkomin bók eftir þrjár konur í Vestmannaeyjum,  Þórönnu Margréti Sigurbergsdóttur, Veru Björk Einarsdóttur og Oddnýju Garðarsdóttur.  Þær segja frá sorginni við sonamissi og styrk kristinnar trúar.  Oddný kemur til okkar og segir frá samtölum þeirra sem urðu að bókinni sem Skálholtsútgáfan gefur út.  Samveran verður í stofum okkar í Þingholtsstræti 17 og hefst klukkan hálf fimm og lýkur klukkan sex.  Mikið væri gaman að fá þig með.  Við hitum súkkulaði handa þér og ekki má nú minna.

Messa verður í Grensáskirkju kl. 20 12. nóvember. Í guðþjónustunni fjöllum við um Hvíld fyrirgefningarinnar, það undursamlega boð Jesú að fá að fyrirgefa sjfálfum okkur af því að Guð vinkona okkar fyrirgefur okkur.   Ragnhildur Ásgeirsdóttir segir frá trú sinni og leiðir okkur í þakkarstund fyrir blessun fyrirgefningarinnar og við höfum bænastund með bænum okkar allra.    Aðalheiðuir Þorsteinsdóttir stjórnar sálmum okkar með Kór Kvennakirkjunnar og séra Auður Eir Vilhjálmsdóttir predikar.

Við drekkum kaffi og spjöllum saman í lokin.  Velkomin og ykkur verður stórlega fagnað.

Í dag 23. október kl. 16:30 koma Sigga og Vala úr hljómsveitinni Evu á námskeið Kvennakirkjunnar í Þingholtsstrætið. Þær héldu nýlega glæðingamessu, þar sem þær fóru nýjar leiðir í helgihaldi og héldu óhefðbundna messu í Langholtskirkju. Þær koma og ræða við okkur um gjörninginn og trúna. Einstaklega spennandi samræður. Þú ert velkomin !

Næsta guðþjónusta Kvennakirkjunnar verður Bænadjass í Laugarneskirkju 15. október kl. 20:00. Aðalheiður, Anna Sigga og við allar flytjum saman bænamessu með djassívafi. Drekkum kaffi á eftir í safnaðarheimilinu og þær sem sjá sér fært að færa okkur góðgæti fá alúðarþakkir. Verið öll hjartanlega velkomin !

Næsta mánudag, 25. september kl. 16:30 heldur námskeið Kvennakirkjunnar áfram. Þá mun sr. Agnes Sigurðardóttir koma og ræða við okkur um grundvöll trúar okkar og kvennaguðfræði. Námskeiðin eru haldin í húsakynnum Kvennakirkjunnar í Þingholtsstræti 17 og þangað eru þau öll sem áhuga hafa velkomin !

Fyrsta námskeið Kvennakirkjunnar í vetur verður mánudaginn 18. september kl. 16:30 til 19:00.  Til jóla ætlum við að tala um grundvallaratriði guðfræðinnar. Komdu endilega með þínar eigin spurningar og við svörum þeim saman.

Það er nauðsynlegt fyrir okkur að þekkja okkar eigin kristnu guðfræði og ræða hana og skilja eins og við mögulega getum.

Margar af kvenprestum þjóðkirkjunnar eru í Kvennakirkjunni og þær koma til okkar eftir því sem þær geta.

Verum allar innilega velkomnar, njótum samverunnar og förum heim með gleðina sem við gefum hver annarri.

Kvöldguðþjónusta verður við Kjarvalsstaði 19. júní kl. 20. Kvennakirkjan heldur guðþjónustuna í samvinnu við Kvenréttindafélag Íslands og Kvenfélagasamband Íslands. Séra Auður Eir Vilhjálmsdóttir predikar.  Aðalheiður Þorsteinsdóttir og kór Kvennakirkjunnar annast guðþjónustuna með séra Arndísi G., Bernhardsdóttur Linn og Elísabetu Þorgeirsdóttur.  Ragnhildur Ásgeirsdóttir og Anna Sigríður Helgadóttir syngja.  Ásdís Þórðardóttir leikur á trompet.

Alexandra Chernyskova óperuaöngkona frumflytur sálm  Hallveigar Thorlacius og Láru Bryndísar Eggertsdóttur. Fjölbreytt guðþjónusta í bjartri kvöldkyrrðinni.

Maímessa Kvennakirkjunnar verður í Garðakirkju 14, maí klukkan 20.Edda Björgvinsdóttir predikar,   Rannveig Guðmundsdóttir og Þórunn Sveinbjarnardóttir tala og Guðrún Ásmundsdóttir les ljóð.  Kristín Stefánsdóttir syngur einsöng.  Aðalheiður Þorsteinsdóttir og séra Auður Eir Vilhjálmsdóttir sjá um messuna með kór Kvennakirkjunnar.   Þetta verður yndisleg messa og alveg sérstaklega ef þú kemur.