Dagleg trú

 Postulasagan   2. 43 – 47    –  Fyrsti söfnuðurinn  var í Jerúsalem –  þau áttu allt saman og hittust á hverjum degi  í musterinu og heima, borðuðu saman og lofuðu Guð

Postularnir, konur og menn, gera mörg tákn og undur og fólk gengur í kirkjuna.  Þau halda hópinn og eiga allt saman.  Fólk selur eigur sínar og setur í sameiginlegan sjóð.  Þau hittast á hverjum degi í helgidómi Gyðinganna í Jerúsalem og  líka heima þar sem þau brjóta brauð í helgri athöfn til að þakka fyrir upprisu Jesú Krists.  Svo borða þau saman og lofa Guð.  Þau eru vinsæl og Guð bætir daglega nýju fólki í hópinn.

Kærleikssamfélag hópsins

Lúkas skýrir frá þessu einstaka kærleikssamfélagi sem ríkti í fyrsta söfnuðinum.  Þegar kirkjan varð fjölbreyttara samfélag fólks af ólíkum uppruna og skoðunum kom upp ýmis togstreita sem varð að leysa.  Það sést í seinni köflum í Postulasögunni og  bréfunum sem taka við af Postulagsögunni í Nýja testamentinu.   Trúin á Jesúm Krist krossfestan og upprisinn var aldrei véfengd.  Það var hennar vegna sem hópurinn varð til og fólk gekk í hann.  Togstreitan var ekki vegna efasemda um trúna á Krist heldur um trúfesti við gyðingdóminn og um framkvæmdir í starfinu.

Heimspekingurinn Epiktet var fæddur í Litlu Asíu um 50 eftir Krist.  Hann sagði:  Hve lengi ætlar þú að draga það að telja þig verðan æðstu gæða og brjóta í engu gegn tærri skynsemi?  Þú hefur tekið við boðskapnum sem þú átt að haga þér eftir.  Hvaða kennara annars bíður þú til að fela honum uppeldi þitt?  Þú et enginn unglingur lengur, heldur fullvaxinn maður.  ….. Teldu þig verðan þess að lifa sem þroskaður maður og batnandi.  Og allt sem þér virðist best, skal vera þér lög.

Í kristinni trú treystum við því að við verðum verð æðstu gæða fyrir gjöfina sem Jesús gefur okkur í krossinum og upprisunni.  Æðstu gæði okkar er þessi gjöf.  Og látum það ekki dragast að taka á móti henni – svo að við séum verðugar hverrar gæfu sem dagurinn býður okkur.

Með blíðum kveðjum,  Auður Eir

Postulasagan 2. 12 – 42    –  Hvítasunnupredikunin var um upprisu Jesú  –  trúið og skírist í nafni Jesú Krists og fáið fyrirgefningu synda ykkar

Sumu aðkomufólkinu fannst  undursamlegt að heyra sitt eigið tungumál en  önnur sögðu að loftstofufólkið hefði fengið sér í tána.  Þá kvaddi Pétur sér hljóðs.  Þetta var fyrsta predikuninni í kirkjunni.  Predikun Péturs var um upprisu Jesú.  Guð leysti Jesúm úr böndum dauðans og reisti hann  upp.  Það hefði aldrei getað gerst að dauðinn héldi honum.  Nú getið þið öll sannfærst um að þessi Jesús sem þið krossfestuð er Kristur.  Trúið því, breytið um hugarfar, skírist í nafni Jesú Krists og fáið fyrigefningu syndanna og gjöf heilags anda.

Styrkt hjarta og styrkur hugur hjálpar okkur til að komast yfir þá eftirsjá sem við hljótum að mæta og skissurnar sem við komumst ekki hjá að gera í lífinu.   Hver dagur verður endurfæðing og þú sýnir öðru fólki hvernig á að njóta lífsins.  Ef við erum skýr í hugsun og rausnarleg, hreinskilin og hugrökk er trúlegt að við hljótum margskonar ávinning sem við áttum ekki von á og finnum velvild í garð okkar.

Blíðar kveðjur,  Auður Eir

2. 1 –  13 Tungutalið á hvítasunnunni

Seinna varð annars konar tungutal iðkað sums staðar í nýstofnaðri kirkjunni eins og sést í Korinþubréfinu.  Það er enn talað tungum í sumum hlutum kristinnar kirkju eins og við þekkjum í Hvítasunnusöfnuðinum hér og berum sjálfsagða virðingu fyrir.  En undrið á hvítasunnunni  var einstakt.  Jesús gaf mátt sinn, skilning og kærleika eins og hann hafði lofað.  Svo að fólkið hans gat framkvæmt það sem hann fól því.  Það gat lífað í trúnni á hann, treyst honum í gleði og ofsóknum,  fyllst kjarki og breitt trúna út um alla veröldina.  Undur hvítasunnunnar  gerist þess vegna  líka núna í hvert skipti sem þau sem heyra fagnaðarerindið heyra að það er talað til þeirra.  Og undur hvítasunnunnar endurtekur sig alltaf þegar fólk Krists lifir í vináttu hans.  Heilagur andi  heldur áfram að gefa kristnu fólki sínu mátt, kjark og ást til að lifa í sífellri siðbót.

Konfúsíus var og er hinn mikli spekingur Kínverja.  Hann var uppi um 500 fyrir Krist.  Við getum með gleði tekið til okkar margt í speki hans.  Hann segir:

Ef við erum laus við óró, ráðleysi og ótta höfum við minni ástæðu til að kvarta yfir því sem gerist kringum okkur og við finnum betur og betur til hamingju okkar.  Það er mesti lærdómur okkar að auka hæfileika okkar til að vera hamingjusöm.

Í kristinni trú treystum við því að Guð gefi okkur ró, ráð og hugrekki. Það byrjar hvern dag með bæn, samtali okkar og Guðs,  og heldur áfram allan daginn í vináttu Guðs.   Það er dásamlegt.

Blíðar kveðjur,  Auður Eir

Postulasagan   2. 1 -13  –   Hvítasunnan

Hvítasunnan var komin.  Hún var hátíð Ísraels til að minnast þess þegar lögmálið var gefið á Sínaí.  Hvítasunnan er hátíð kristinnar trúar af því að þá var kirkjan stofnuð.  Þau voru öll í loftstofunni.  Þá gerist undrið sem Jesús hafði heitið þeim en þau gátu ekki ímyndað sér  hvernig yrði.  Heilagur andi birtist með gný af himni og fyllti húsið.  Þeim birtust eldtungur sem settust á þau öll svo þau töluðu útlend tungumál sem þau kunnu ekki en andinn gaf þeim.  Fólk streymir að og öll heyra talað á sinni eigin tungu.   Það var undrið mikla, gjöf andans.

Það voru margar konur í hópnum

Lúkas er hvorki að segja ævisögur þeirra  Péturs,  Jóhannesar og Páls sem hann skrifar mest um né annarra í kirkjunni.  Hann er að skýra frá því hvernig fagnaðarerindið um upprisu Jesú Krists sigraði í margslungnum heiminum.   Hann segir varla nokkuð um konurnar í hópnum.  Hann  segir frá nokkrum þeirra í guðspjallinu og í upphafi 8. kaflans nafngreinir hann nokkrar þeirra sem unnu með Jesú.  Í  síðasta kafla Rómverjabréfisins, sem Páll skrifar,  er getið nokkurra kvenna sem höfðu þá forystuhlutverk í kirkjunni.   Störf þeirra hafa verið þau sömu og forystustörf mannanna í söfnuðunum.  Meðal þessara kvenna er Júnía sem var postuli.  Jesús kallaði konur til starfa og gerði þær að fyrstu vottum upprisunnar.  Hann breytti lífi þeirra og kirkjan fylgdi því um skeið eins og sést í bréfum Páls.  Páll átti margar samstarfskonur og  var kvenréttindamaður þótt það brygði stundum út af því.  En  það var ekki oft.

Nú skín sólin í kuldanum en kannski verður rigninin
Komin þegar þú færð þetta bréf.  Sumir dagar eru
hlýrri en aðrir og sums staðar hlýrra en annars
staðar, það er hlýrra undir húsveggjum en úti á
götu.  Það er eins og með lífið sjálft.  Eða hvað
finnst þér?

Mér finnst verulega skynsamlegt að njóta þess
þegar við getum að sitja undir hlýjum veggjunum
okkar.  Við eigum það bara skilið.  Það er jafn
skynsamlegt að sitja að góðum hugsunum eins og
við mögulega getum og vera ekki að hleypa hvers
lags hugsunum að okkur sem við getum ekkert gert
við.  Eða hvað finnst þér?

En við þurfum samt stundum að fara út í kuldann
og líka

Blíðar kveðjur

Auður Eir

Postulasagan   1. 9 – 26  –  Jesús fer til himna og hverfur í skýjunum 

Eftir þetta fór hann til himna og hvarf í skýjum himinsins.  En englar koma og segja hópnum að Jesús komi aftur eins og hann fór.  Þau fara fagnandi til Jerúsalem og safnast saman í loftstofunni sem þau höfðu til umráða og velja  Matteus í stað Júdasar til að koma í hóp postulanna.  Lúkas nafngreinir nokkra mannanna og segir að fjölskylda Jesú hafi líka verið þarna.   Hann nafngreinir ekki konurnar í hópnum nema Maríu mömmu Jesú.  En hann segir frá því að konurnar hafi líka verið þar:  Konurnar voru einnig í hópnum, skrifar hann.