Um leið og Kvennakirkjukonur óska öllum nær og fjær velfarnaðar á nýju ári er blásið til hugmyndafundar næstkomandi fimmtudag, 9. janúar. Hugmyndafundurinn verður í sölum Kvennakirkjunnar að Þingholtsstræti 17 og hefst kl. 17:30. Á fundinum verða settar fram og unnið úr hugmyndum um starfið framundan, námskeið og guðsþjónustur.
Jólamessa Kvennakirkjunnar verður haldin í Háteigskirkju 27. desember kl. 20:00. Séra Arndís G. Bernhardsdóttir Linn prédikar, Hallfríður Ólafsdóttir leikur á þverflautu og Anna Sigríður Helgadóttir syngur einsöng. Aðalheiður Þorsteinsdóttir leiðir jólasöng með kór Kvennakirkjunnar og á eftir verður jólakaffi.
Við höldum jólin af því að Guð kom. Sjálf. Í eigin persónu. Hún sem átti allt og hafði sjálf skapað það. Og falið það í hendur fólksins síns sem hún elskaði. Það var ekki að því að spyrja, og hún hlaut að vita það áður en allt byrjaði, að fólkið sem hún elskaði fór með allt út í móa. Svo hún ákvað að koma sjálf. Og vera Jesús. Þetta heppnaðist stórkostlega. Breiður af alla vega fólki slógust í hópinn um alla veröldina öld eftir öld. Og þess vegna erum við núna að lesa þetta bréf og hittast í Kvennakirkjunni okkar.
Nú skulum við fela henni allt. Henni sem kom til okkar. Til þín. Sem fórst líklega stundum út í móa eins og við hinar. Hún sótti þig alltaf. Af því að henni finnst til um þig og þarfnast þín og elskar þig. Nú þegar aðventan bíður okkar með annir og frið skulum við hvíla í þessu og gefa okkur næði til þess. Og við skulum láta það gleðja dagana svo við getum gert það sem við þurfum að gera og það sem við ætlum að gera þótt við þurfum þess ekki, við gerum það bara af því að það er svo gaman.
Guð gefur okkur allt sem við þurfum. Og við gefum fólkinu í kringum okkur eitt og annað og fáum frá því svo magt gott á dögunum til jóla.
Blíðar kveðjur. Auður
María og Jósef voru fólk á ferð. Þau voru á ferðalagi frá Nasaret til Betlehem til að láta skrásetja sig því það var manntal í ríkinu. Þannig var hin fyrsta aðventa. Þau voru bíða fæðingar barnsins, undirbúa komu þess ásamt því að sinna því sem þurfti.
Við erum einnig að undirbúa komu barnsins á aðventunni. Að mörgu þarf að hyggja. Við erum fólk á ferð og sjaldan vill ferðin á okkur verða meiri en á aðventunni. Á aðventunni sem endra nær er Biblían vegakortið okkar og vísar okkur veginn til fyrirheitna staðarins sem í þessu tilfelli eru jólin.
Barnið er að fara að fæðast. Jólafastan, aðventa, er andlegt ferðalag til móts við birtu jólanna, fagnaðarerindi jólanna, gleðiboðskapinn: Yður er í dag frelsari fæddur. Undirbúum komu jólanna með tilhlökkun í hjarta. Iðrumst og hreinsum til í lífi okkar með hjálp Guðs. Þá fær ljós Guðs að lýsa upp hjörtu okkar og lýsa upp jólin.
Sr. Hulda Hrönn M. Helgadóttir
Að vera búin að kaupa allar jólagjafir og baka og hafa hreina glugga áður en ég skreyti þá. Sem sagt að hafa allt á hreinu og hafa aðventuna fyrir mig og fara á tónleika og gera það sem mér var huglægast. Jú, jú, svolítil sjálfselska, það má líka.
En við tökum á móti dögunum sem koma, þeir koma bara, og við fáum engu breytt um hvað þeir boða, þeir eru bara misgóðir og misbjartir og sumir boða sorg, við sköpum ekki þá reynslu sem dagarnir koma með, við göngum í gegn um hana, þeir spyrja ekki hvað við viljum.
En manni finnst að þessi tími eigi að vera án áfalla. Við stöndum frammi fyrir því hvað við erum lítil, þegar sorglegir atburðir koma, og þegar veikindi verða hjá okkar nánustu og þeim sem manni þykir vænt um þá verðum viðdöpur og áhyggjufull. En þetta má ekki, ég veit að Guð hefur bannað það að hafa áhyggjur og depurð, hún er búin að segja „ég skal taka þínar áhyggjur og verð alltaf með þér, sama hvað sem er að gerast hjá þér“. Svo ég hef sett þetta allt í hennar hendur, þess vegna ætla ég að einblína á ljósið sem er framundan, með tilhlökkun til aðventunnar, og þegar ljósið kemur til okkar.
Þökk fyrir jólin elsku Guð og kærleikann sem umvefur okkur í þínu ljósi með fjölskyldum okkar og vinum, megi nýja árið vera á þínum vegum svo við megum þjóna þér og samferðafólki okkar í kærleika þínum.
Súsanna Kristinsdóttir
Þá hefur annað upplag að nýútkomnu hefti í ritröð Kvennakirkjunnar, Vertu leiðtogi í þínu eigin lífi eftir Auði Eir Vilhjálmsdóttir verið gefið út.
Þetta er lítið hefti í 5 köflum og 5 fallegum litum og er um möguleikana til að lifa hversdagslegu lífi okkar með hin undursamlegu ráð Fjallræðunnar í hjarta okkar. Heftið var upprunalega kynnt á nýafstöðu námskeiði í Kvennakirkjunni með sama nafni.
Heftið fæst á 1500 krónur.
Hægt er að hafa samband við þær sem bralla daglega í Þingholtsstræti – og svo verður heftið líka til sölu í Kirkjuhúsið. Síminn okkar er 551 3934 og netfangið kvennakirkjan (hja) kvennakirkjan.is. Nú svo er líka hægt að hringja til Auðar í 864 2534.
Bókin vakti svoddan lukku á námskeiðinu að konum fannst nauðsynlegt að gefa tækifæri til að hafa hana til gjafa svo Aðalheiður prentsmiðjustóri okkar prentaði meira fyrir okkur.
Aðventumessa verður 1. desember klukkan 20 í Kirkju Óháða safnaðarins við Háteigsveg á fyrsta sunnudegi í aðventu
Séra Auður Eir Vilhjálmsdóttir predikar. Kór Kvennakirkjunnar leiðir aðventusöng undir stjórn Aðalheiðar Þorsteinsdóttur
Kaffi á eftir . Þær sem sjá sér fært að færa okkur góðgerðir með kaffinu fá alúðarþakkir
Við komum til að finna frið og hugrekki og förum heim með þessar undursamlegur gjafir Guðs
Ég var að rifja upp ýmsar skemmtilegar lýsingar sem við höfum um okkur sjálfar og annað fólk. Eins og: Ég ætlaði að segja þeim meiningu mína en missti kjarkinn og varð eins og smjör í volgri hendi. Ég er alveg niðurbrotin eins og samanbrotið pappírsblað, þótt það sjáist ekki á mér. Ég er eins og mulin paprikka í glæru glasi og allt fólk sér það. En þetta er best: Hún Sigríður er svo dugleg. Og svo er nú Jónína eins og hún er.
Biblían er full af ýmsum lýsingum á fólki sem var alla vega uppgefið og vonlaust leynt eða ljóst og fékk þann úrskurð hjá öðrum að það væri nú eins og það er. Ég held að uppgjöfin sé stundum eins og öryggisventill svo að það sjóði ekki upp úr í huga okkar. Ég held að við megum læra að gefast stundum upp. Hvað heldur þú?
Fólkið í Biblíunni endaði aldrei lýsinguna í uppgjöf. Endirinn var svona: Þá rétti Guð mér hendina og reisti mig aftur upp. Þegar Guð kom sjálf og varð ein af okkur, Jesús frelsari okkar, þá sagði hún: Þú ert ekki lengur þjónustustúlka. Þú ert vinkona mín. Þú átt allt með mér og ég geri þig með mér að ljósi heimsins. Hvað segirðu um það í dag?
Blíðar kveðjur, Auður
Þriðjudaginn 12. nóvember heldur dr. Mary Hunt opinberan fyrirlestur í boði Guðfræðistofnunar í stofu 220 í Aðalbyggingu HÍ. Fyrirlesturinn hefst kl. 11:40 og er öllum opinn. Yfirskrift fyrirlestursins er:
Bandarískur femínisti talar um rómversk kaþólsku kirkjuna á eftirlendutímum
Rómversk kaþólska kirkjan gengur í gegnum miklar en jafnframt hægfara breytingar um þessar mundir, bæði hvað varðar kenningar og skipulag. Óljóst er hver staða kvenna kemur til með að verða og hið sama má segja um stöðu allra leikmanna innan kirkjunnar. Fram að þessu hefur rómversk kaþólska kirkjan verið sannkölluð prestakirkja en nú gerir óvígt fólk kröfu um að fá að taka þátt í ákvarðanatöku, útdeilingu sakramentanna og þjónustu kirkjunnar. Ómögulegt er að segja fyrir um það hvað þessar breytingar kunna að hafa í för með sér en í fyrirlestrinum leggur dr. Hunt áherslu á að útskýra ástandið eins og það er í dag.
Dr. Mary Hunt er kaþólskur guðfræðingur og femínisti sem setti á laggir guðfræði- og kvennastofnunina WATER (Women´s Alliance for Theology, Ethics and Ritual) í Washington D.C. árið 1983 og hefur veitt henni forstöðu í þrjátíu ár. Dr. Hunt er virk í kaþólsku kvennakirkjuhreyfingunni í Bandaríkjunum og hefur einnig starfað með mannréttindahreyfingu kaþólskra kvenna í Argentínu.
Dr. Hunt hefur skrifað og ritstýrt fjölda bóka og er ötull greinahöfundur. Meðal bóka hennar er Fierce Tenderness: A Feminist Theology of Friendship og Good Sex: Feminist Perspectives from the World’s Religions sem hún ritstýrði ásamt Patricia Beattie Jung og Radhika Balakrishnan.
Sjá nánar hér
Námskeið Kvennakirkunnar um kvennabaráttukonur sem höfðu kristna trú til styrktar í baráttu sinni svo sem er skrifað um í bókinni Kvennabarátta og kristin trú sem kom út 2007.
Námskeiðið er í Þingholtsstræti 17, í fimm mánudagskvöld frá 4. nóvember til 2. desember, frá klukkan hálf átta til níu.
Mánudagskvöldið 11. nóvember:
Arnfríður Guðmundsdóttir talar um Lúter og konurnar. Áhrif siðbótar Marteins Lúters á líf kvenna
Mánudagskvöldið 18. nóvember:
Dagný Kristjánsdóttir talar um skáldsögur Kristínar Sigfúsdóttur, „Gestur var ég …“
Mánudagskvöldið 25. nóvember:
Nína Leósdóttir talar um „þá heilögu hjónabandsstétt“ í fimm íslenskum húspostillum frá 1718 til 1901
Mánudagskvöldið 2. desember:
Sigríður Dúna Kristmundsdóttir talar um frumkvöðulinn Ólafíu Jóhannsdóttur, konu kvennanna.
Þetta verður dásamlegt. Verum innilega velkomnar. Við þurfum ekki að skrá okkur. Komum bara og njótum frábærra kvölda.
