Jólamessa Kvennakirkjunnar verður í Háteigsskirkju sunnudagskvöldið 29. desember klukkan 20. Séra Auður Eir Vilhjálmsdóttir predikar, Aðalheiður Þorsteinsdóttir stjórnar jólasálmum við kertaljós og við drekkum jólakaffi og tölum saman. Þær sem sjá sér fært að koma með góðgerðir fá alúðarþakkir. Verum innilega velkomnar.
Við skulum njóta daganna til jóla. Þeir verða svo góðir ef við förum rétt með þá. Það vitum við allar. Þeir verða eins og undur fallegur söngur sem breytist svo af sjálfu sér í jólasálmana og gleðina sem jólin færa okkur.
Er það ekki gott að við skulum sjálfar geta haft stjórn á þessum dögum sem er svo mikið talað um að verði órói og erfiði og kannski vonbrigði líka?
Förum vel með þá. Við segjum að það sé samstarf okkar og Guðs að gera dagana eins og okkur langar svo til að þeir séu. Það stendur ekki á Guði að rétta okkur hendina og hjálpa okkur við þetta mikla og góða verk. Verkið er í trú okkar og trausti til hennar og gleðinni yfir því að eigahana sem vinkonu okkar. GLEÐILEG JÓL.
Blíðar kveðjur, Auður
Mánudaginn 18. nóvember sagði Auður frá Kvennaguðfræði múslímskra kvenna. Hún sagði frá bók eftir tvo kvennaguðfræðinga
múslíma sem kom út 2016. Múslímskar konur fá æ meiri réttindi og færri og færri nota slæðuna. Fjölkvæni er leyft í íslam því Múhameð átti margar konur. En hvorki umskurn kvenna né heiðursmorð eru frá Kóraninum.
Mánudagskvöldið 25. nóvember sagði Auður frá bók eftir ameríska predikarann Joyce Meier sem sést í sjónvarpi Ómega. Bókin kom út 2018 og heitir Healing the Soul of a Woman. Joyce Meier segir frá því hvernig Jesús Kristur tók hana að sér þjáða og reiða og gerði hana heila og sterka.
Námskeiðin eru alltaf í stofum okkar í Þingholtsstræti 17 frá klukkan 16.30 til 18 Næsta verður mánudaginn 2. desember
Boðberar
Það rennur upp fyrir mér ljós,
svo skært að mér liggur við blindu.
Það voru konur sem fluttu fyrstar fréttirnar
á páskum
ótrúlegar fréttir.
Það voru konur,
sem skunduðu til að hitta vinkonur og vini Jesú
og andstuttar, forviða,
létu mestu orðin falla:
Hann lifir.
Hugsum okkur,
hvað, ef konur hefðu þagað?
Marta Wilhelmsson
Guðþjónusta Kvennakirkjunnar verður í Þingholtsstræti 17, 1. desember kl. 20. Sálmasöngur og aðventuprédikun við kertaljós og kaffi. Aðalheiður Þorsteinsdóttir stjórnar söngnum og Kvennakirkjukonur tala saman um hvað þeim finnst vænst um í kristinni trú. Mikið verður gaman og meira gaman ef þú kemur.
Enn og aftur er talað um þungann af angistinni. Það er von. Kvíðinn er alltaf
nálægur fyrr og síðar þótt misjafnlega mikið sé talað um hann. Eins og við
vitum eru Sálmar Biblíunnar að miklu leyti um angistina. Hjálpaðu mér, Guð,
sagði fólkið. Komdu og hjálpaðu mér. Jesús talaði um angistina og bauð fólki
að koma til sín og fá frið.
Boðið stendur alltaf. En óróin sem vekur angistina hefur ekki horfið. Ég
ætla ekki að taka ykkur út úr veraldarvafstrinu, sagði Jesús í síðustu
kvöldmáltíðinnni. En ég ætla að vera þar með ykkur. Ég ætla að gefa ykkur
frið í heiminum, ekki eins og heimurinn gefur heldur eins og ég einn gef.
Bænin er besta vörnin gegn angistinni. Við getum orðað angist okkar við Guð
eða við getum bara farið til Guðs og verið hjá henni. Ég hef sagt það fyrr,
við getum verið hjá Guði eins og við vorum einu sinni hjá mömmu okkar eða
pabba eða öðru fólki sem við treystum og vissum að elskaði okkur og myndi
alltaf hjálpa okkur, vernda okkur og uppörva okkur. Það var sama hvað
gerðist, þau myndu aldrei bregðast.
Finnurðu ekki hvað það er alltaf gott að vera með góðu fólki, svo að þið
talaði saman og finnið að þið eigið svo margt saman í lífinu? Er það ekki
ein af undursamlegum gjöfum Guðs?
Blíðar kveðjur, Auður
17. nóvember verður guðþjónusta í Seltjarnarneskirkju kl. 20. Séra Hulda Hrönn M. Helgadóttir prédidkar. Aðalheiður Þorsteinsdóttir stjórnar sálmasöng. Kaffi og samvera eftir messu. Þær sem sjá sér fært að færa kaffibrauð fá alúðarþakkir
Guðþjónusta verður í stofufm okkar í Þingholtsstræti 17 næsta sunnudag, 20. október kl. 20. Prestar Kvennakirkjunnar predika, Aðalheiður Þorsteinsdóttir stjórnar yndislegum sálmasöng. Við hlustum og syngjum og biðum og tölum saman og drekkum kaffi. Vertu velkomin!
Á sunnudaginn 29. september vígist Dr. Maria Leppäkari framkvæmdastýra Sænsku guðfræðistofnuninnar í Ísrael til prestsembættis hjá Lúthersku kirkjunni í Jórdaníu og landinu helga. Þetta eru tímamót í sögu kirkjunnar því hún verður fyrst kvenna til að vígast til kirkjunnar.
Þennan sama dag fyrir 45 árum vígðist sr. Auður Eir Vilhjálmsdóttir til Staðarprestakalls í Súgandafirði og verður þess minnst í guðsþjónustu Kvennakirkjunnar sunnudagskvöldið 29. sept. kl.20:00 í Neskirkju. Sjá kvennakirkjan.is.
Nú hafa 100 konur vígst til prestsembættis í Lúthersku Þjóðkirkjunni á Íslandi.
Tímarnir breytast. Og eins og Dr. Margot Kässmann, sem fyrst kvenna vígðist til biskups í Lúthersku kirkjunni í Hannover árið 1999, komst að orði um höft sem hún m.a. mætti: «Þar til árið 1977 misstu vígðar konur í Þýskalandi stöðu sína þegar þær giftust. Í Zambíu var þessu öfugt farið: Konur gátu ekki vígst nema þær væru giftar.»
Dr. Maria Leppäkari er okkur íslendingum að góðu kunn í gengum starf hennar hjá Sænsku guðfræðistofnuninni. Hún hefur tekið á móti hópum frá Íslandi, og eins kom hún til landsins í fyrra og hélt fyrirlestur á afmæli Prestafélags Vestfjarða um sáttargjörð en Maria er doktor í trúarlífsfélagsfræði með áherslu á trú, átök og ofbeldi.
Vígslubiskupinn sr. Kristján Björnsson og sr. Hildur Inga Rúnarsdóttir munu fara út til Jerúsalem og taka þátt í athöfninni. Við óskum söfnuðinum til hamingju með þennan áfanga og biðjum Mariu velfarnaðar í starfi.
Fyrsta guðþjónusta Kvennakirkjunnar verður í Neskirkju sunnudaginn 29. september kl. 20:00. Þar verða hátíðarhöld vegna 45 ára afmælis prestvígslu sér Auðar Eir.
Séra Auður Eir Vilhjálmsdóttir predikar og séra Arndís G. Bernhardsdóttir Linn talar
Aðalheiður Þorsteinsdóttir stjórnar sálmum og Anna Sigríður Helgadóttir syngur
Kvennakirkjan býður veitingar svo nú þurfum við ekki að koma með annað en okkur sjálfar. VErum allar hjartanlega velkomnar.
