Guðþjónusta Kvennakirkjunna nú í apríl verður í Neskirkju, sunnudaginn 23. apríl kl. 20. Prestarnir séra Dalla Þórðardóttir og séra Yrsa Þórðardóttir predika.
Ragnheiður Ragnarsdóttir syngur eigið lag og Elín Þöll Þórðardóttir og Yrsa Þórðardóttir syngja
Séra Arndís og séra Auður, Aðalheiður Þorsteinsdóttir og kór Kvennakirkjunnar og öll sem koma sjá um messuhaldið
Þær sem sjá sér fært að koma með meðlæti fá alúðarþakkir.
Sjáumst í Neskirkju !
Í Kvennakirkjunni tölum við um kvíðann og þann undursamlega sannleika að Guð læknar kvíða okkar. Við skulum heyra loforð Guðs:
Guð sagði aftur og aftur við fólkið sitt að það skyldi alltaf rifja það upp fyrir sér hvernig hún hjálpaði því. Fyrst og fremst skyldu þau minnast þess hvernig hún frelsaði þau þegar þau voru þrælar í Egyptalandi. Þá leiddi ég ykkur yfir hafið og gegnum eyðimörkina. Ég fór á undan ykkur á kvöldin eins og ljós til að finna ykkur næturstað og ég gekk á eftir ykkur á daginn eins og ský svo að óvinirnir sem eltu ykkur sæju ykkur ekki.
Eins og Guð frelsaði fólkið sitt úr þrældómi í Gamla testamentinu með því að standa á milli þeirra og óvinanna segir í Nýja testamentið hvernig hún kom í Jesú til að frelsa okkur frá okkar eigin hugsunum sem elta okkur. Hugsunum eins og kvíðanum.
Jesús kom og sagði við okkur: Komið til mín með þungar hugsanir ykkar og ég gef ykkur frið í hjarta ykkar. Ég gef ykkur minn frið en ekki það sem heimurinn kallar frið og er engnn friður. Ég frelsa þig. Þú þarft ekki að hafa áhyggjur af því hvernig þú getur gert þetta. Þú þarft ekkert að gera. Þú skalt bara vera í mér eins og greinin er á tréinu. Vertu í mér og þá finnurðu frið.
Guð blessar okkur orðið sitt. Amen.
Á næsta sunnudag, 12. mars kl. 20 verður Guðþjónusta Kvennakirkjunnar í Laugarneskirkju . Séra Auður Eir Vilhjálmsdóttir predikar og Hálfdan Árni Jónsson les ritningarlestur. Þorsteinn Jónsson leikur á gítar og Hugrún Elfa Sigurðardóttir á flautu
Við syngjum með Aðalheiði Þorsteinsdóttur og kór Kvennakirkjunnar
Kaffi á eftir og þær sem sjá sér fært að koma með meðlæti fá alúðarþakkir
Nú er siðbótarárið mikla, 500 ár síðan Lúter kom fram með stórkostlega siðbót sína. Hann sagði að við skyldum ekki treysta siðum og hefðum heldur trúnni. Það breytti kirkjunni og gaf hverri einustu manneskju sem það vildi þiggja sannfæringu um að hún ætti frið og uppörvun Guðs. Guð myndi styðja hana til að nota trú sína í öllu daglegu lífi sínu.
Síðan eru 500 ár. Hvað segjum við núna? Við skulum tala saman um það. Ég hef sagt að ég held að það séekki sem verst fyrir okkur að halda áfram eins og við höfum gert. Standa staðfastar í trú okkar og gleðjast yfir henni og nota hana í öllum dögum okkar. Við skulumhalda áfram að tala saman og efla trú okkar, dýpka hana og víkka og gera okkur betur og betur grein fyrir þvi hvað hún er. Við skulum dýpka guðfræði okkar og við skulum vinna þau verk sem við getum í trúnni.
Eða hvað finnst þér?
Ég held að þetta sé svo gagnlegt. Af því að ég er handviss um að það hefur mikil áhrif. Við berum allar með okkur trausta og glaðlega trú okkar út í daglegt lífið og höfum áhrif í kringum okkur. Og það gera aðrir hópar líka. Svo í sameiningu breytum við heiminum. Og það held ég nú að sé áframhaldandi siðbót.
Blíðar kveðjur, Auður Eir.
Afmælisguðþjónusta Kvennakirkjunnar verður í Neskirkju sunnudaginn 12. febrúar kl. 20:00. Sr. Arndís G. Bernhardsdóttir Linn prédikar. Aðalheiður Þorsteinsdóttir stjórnar sálmasöng okkar. Anna Guðmundsdóttir annast kaffið. Þær sem sjá sér fært að færa góðgerðir
Námskeið Kvennakirkjunnar halda áfram á mánudögum eins og fyrir jólin. Næst hittumst við 30. janúar kl. 16:30 til 18 í Þingholtsstrætinu og ræðum um jólabækur. Allar velkomnar.
Mánudaginn 23. janúar hitta kvennakirkjukonur Kristínu Gunnlaugsdóttur myndlistarkonu í Neskirkju klukkan 4.30. Hún ætlar að fjalla um verk sín sem eru nú til sýnis í kirkjunni. Þessi góða samverustund verður á vegum Örþingsnefndar Þjóðkirkjunnar, Félags prestvígðra kvenna og Kvennakirkjunnar. Þetta verður gaman og komið nú allar sem mögulega getið. Það margborgar sig og er fínt tækifæri.
Fyrsta guðþjónusta Kvennakirkjunnar á nýju ári er í Hallgrímskirkju, sunnudaginn 15. janúar kl. 20:00.Við göngum ekki inn um aðaldyrnar heldur bakatil um suðurdyr sem snúa að Eiríksgötu
Þetta verður messa við kaffiborð og við tökum upp á ýmsu og verðum allar með eins og okkur sýnist
Auður predikar og Aðalheiður stjórnar söngnum með pompi og prakt. Þær sem sjá sér fært að koma með meðlæti verða sérlega heiðraðar
GLEÐILEGT ÁR OG TAKK FYRIN HITT ÁRIÐ
Jólaguðþjónustan verður í Háteigskirkju, miðvikudaginn 28. desember kl. 20þ
Séra Arndís G. Bernhardsdóttir Linn predikar
Við syngjum jólasálma með Aðalheiði Þorsteinsdóttur og kór Kvennakirkjunnar og vinkonur okkar flytja okkur jólatónlist
Anna Sigríður Helgadóttir
Kristín Stefánsdóttir
Ragnhildur Ásgeirsdóttir
og kórinn hennar
Við höldum jólakaffi í safnaðarheimilinu og þær sem sjá sér fært að koma með góðgerðir
njóta aðdáunar og þakklætis fyrir að gleðja okkur í spjallinu og vináttunni. Þetta verður stórkostleg guðsþjónusta orða og hljómlistar – ennþá betri ef þú kemur.
